I Wish We Never Met You 4th&5th chapter

Chapter 4 — Things We Never Told Anyone

"Har insaan ke andar ek aisi kahani hoti hai..."

"Jo woh duniya ko nahi batata."

"Kuch kahaniyan lafzon mein nahi..."

"Bas aankhon ke peeche chhupi rehti hain."

Din ke 2:03 baj rahe the.

Baarish ho rahi thi.

Khidki ke sheeshe par paani ki boonden lagataar takra rahi thi.

Kamre mein sirf table lamp jal raha tha.

Uski halki peeli roshni mein Aarav apni diary ke khaali page ko dekh raha tha.

Kabhi-kabhi usse lagta tha ki uski zindagi bhi isi page ki tarah hai.

Khaali.

Shaant.

Aur thodi si adhuri.

Neeche hall se TV ki awaaz aa rahi thi.

Papa news dekh rahe the.

Maa kitchen ka kaam khatam kar rahi thi.

Sab kuch normal tha.

Har din ki tarah.

Lekin phir bhi...

Pata nahi kyun Aarav ko aksar apne hi ghar mein mehmaan jaisa mehsoos hota tha.

Uske parents usse pyaar karte the.

Bahut.

Lekin pyaar aur samajhna...

Dono alag cheezein hoti hain.

Papa ka sapna tha ki woh successful engineer bane.

Maa chahti thi ki woh hamesha khush rahe.

Aur Aarav...

Usse khud nahi pata tha ki woh kya chahta hai.

Uski zindagi mein sab log the.

Lekin koi aisa nahi tha jise woh raat ke 2 baje phone karke keh sake,

"Aaj dil bahut bhaari hai."

Shayad isi liye...

Naina uske liye itni important ho gayi thi.

Phone vibrate hua.

Naina Calling...

Aarav ke chehre par muskaan aa gayi.

Jaise har raat aa jaati thi.

"Hello."

"Hello boring aadmi."

"Ye naam retire nahi ho sakta kya?"

"Nahi."

"Zaalim."

Naina hans padi.

Aur uski hansi sunkar Aarav bhi muskurane laga.

Kuch der dono random baatein karte rahe.

College.

Movies.

Music.

Life.

Phir achanak baat ruk gayi.

Pata nahi kaise.

Lekin aaj dono pehle se zyada chup the.

Kabhi-kabhi do log itne close ho jaate hain...

Ki unhe baat karne ke liye topic ki zarurat nahi padti.

"Naina?"

Aarav ne dheere se kaha.

"Hmm?"

"Ek baat poochun?"

"Poocho."

"Tum itni strong kaise ho?"

Do second.

Paanch second.

Das second.

Khamoshi.

Phir Naina dheere se boli,

"Main strong nahi hoon Aarav."

"Bas tootne ki aadat ho gayi hai."

Aarav chup ho gaya.

Uske dil mein ajeeb si chubhan hui.

"Kya matlab?"

Phone ke us paar halki si saans ki awaaz sunayi di.

"Kuch log hote hain na..."

"Jo bachpan se hi samajh jaate hain ki unki feelings kisi ke liye important nahi hain."

Aarav chupchaap sunta raha.

"Jab tum baar-baar kisi ko apna dard batao..."

"Aur har baar woh ignore kar de..."

"To ek waqt ke baad tum batana hi chhod dete ho."

Uski awaaz bilkul shaant thi.

Lekin us shaanti mein dard tha.

Bahut gehra dard.

Aarav ko pehli baar mehsoos hua...

Ki Naina sirf hansne wali ladki nahi hai.

Woh apne andar poora samundar chhupaye baithi hai.

"Aur tum?" Naina ne poocha.

"Tum itne chup kyun rehte ho?"

Aarav halka sa hans diya.

"Pata nahi."

"Jhooth."

"Tumhe kaise pata?"

"Kyunki jo log 'pata nahi' bolte hain..."

"Unhe sab pata hota hai."

Aarav khidki ke paas jaakar khada ho gaya.

Baarish aur tez ho chuki thi.

Usne pehli baar kisi se woh baat kahi...

Jo usne kabhi kisi ko nahi batayi thi.

"Pata hai..."

"School mein mere bahut dost nahi the."

"Hmm."U

"Main hamesha woh ladka tha..."

"Jise sab jaante the..."

"Lekin koi samajhta nahi tha."

Uski awaaz dheemi ho gayi.

"Main jab bhi udaas hota tha..."

"Sab kehte the — itna kya sochta rehta hai?"

"Jab bhi akela feel karta tha..."

"Sab kehte the — overreact mat karo."

"Phir dheere-dheere maine bolna hi kam kar diya."

Kamre mein sirf baarish ki awaaz thi.

Naina chup thi.

Bilkul chup.

Aur pata nahi kyun...

Aarav ko accha lag raha tha.

Kyunki pehli baar koi beech mein nahi bol raha tha.

Koi uske emotions ko explain nahi kar raha tha.

Koi uska dard chhota nahi bana raha tha.

Koi bas sun raha tha.

Aur kabhi-kabhi...

Yahi kaafi hota hai.

"Tumhe pata hai?" Naina dheere se boli.

"Kya?"

"Tum ajeeb ho."

Aarav hans pada.

"Thanks."

"Nahi seriously."

"Kyun?"

"Kyunki tum sunte ho."

Aarav chup ho gaya.

Uske dil mein kuch halka sa mehsoos hua.

Shayad sukoon.

Shayad khushi.

Ya shayad...

Apnapan.

Us raat pehli baar dono ne ek dusre ke dard ko chhua tha.

Poora nahi.

Bas thoda sa.

Jaise koi band kamre ka darwaza halka sa khol de.

Aur andar ki roshni bahar aa jaye.

Call cut hone ke baad Aarav diary lekar baitha.

Usne likha:

"Aaj usne apna dard bataya."

"Aur mujhe laga..."

"Uski hansi jitni khoobsurat hai..."

"Uske zakhm utne hi gehre hain."

Thodi der baad usne ek aur line likhi.

"Ajeeb baat hai..."

"Hum dono ek dusre ko bas kuch hafton se jaante hain."

"Phir bhi woh meri zindagi ke baare mein utna jaanti hai..."

"Jitna kuch saalon se mere saath rehne wale log bhi nahi jaante."

Usne diary band ki.

Light off ki.

Aur bed par let gaya.

Lekin neend nahi aayi.

Kyunki uske dimaag mein baar-baar Naina ki woh line ghoom rahi thi:

"Main strong nahi hoon..."

"Bas tootne ki aadat ho gayi hai."

Aur usse pehli baar darr laga.

Kahin aisa na ho...

Ki jis ladki ko woh har din thoda-thoda samajhne laga hai...

Uske andar koi aisa dard chhupa ho...

Jise woh abhi dekh hi nahi paaya.

Chapter End

"Har rishta 'I Love You' se gehra nahi hota..."

"Kuch rishte 'Main Samajhta Hoon' se gehre ho jaate hain."

"Aur jab koi tumhare dard ko samajhne lage..."

"To dil usse khona nahi chahta."🌙

"Kuch log hamari zindagi mein der se aate hain..."

"Par unhe khone ka darr sabse pehle lagne lagta hai..." 💔

Chapter 5 — The First Meeting

"Kuch mulaqatein bas mulaqatein nahi hoti..."

"Woh do kahaniyon ka ek hi hafhe par aa jaana hoti hain."

"Aur kuch log..."

"Pehli baar saamne aakar bhi ajnabi nahi lagte."

Teen mahine.

Poore teen mahine ho chuke the.

Teen mahine ki chats.

Teen mahine ki calls.

Teen mahine ki aadat.

Aur teen mahine ka intezar.

Aarav ab Naina ki awaaz se uska mood pehchaan leta tha.

Kab woh sach mein hasti hai.

Kab sirf hasne ka natak karti hai.

Kab woh theek hoti hai.

Aur kab bas "I'm okay" likh deti hai.

Lekin ek cheez ab bhi missing thi.

Mulaqat.

Aaj tak dono ne ek dusre ko sirf photos mein dekha tha.

Kabhi saamne nahi.

Aarav Lucknow mein rehta tha.

Aur Naina...

Jaipur.

Lagbhag 550 kilometer door.

Shuru mein distance itna bada laga tha ki dono ne kabhi milne ke baare mein socha hi nahi.

Lekin waqt ke saath...

Dooriyan numbers lagne lagi.

Feelings nahi.

Us raat bhi dono call par the.

"Aarav?"

"Hmm?"

"Agar main kahun milna hai to?"

Aarav ka dil ek second ke liye ruk gaya.

"Kya?"

"Sunai nahi diya?"

"Sunai diya."

"To jawab?"

Aarav muskuraya.

Khidki ke bahar dekhte hue bola,

"Main to kab se milna chahta hoon."

Phone ke us paar khamoshi chha gayi.

Aur phir...

Naina dheere se hansi.

"To phir milte hain."

Us raat Aarav ko bilkul neend nahi aayi.

Usne lagbhag poori raat apni diary mein likhte hue guzaari.

"Teen mahine pehle ek unknown number meri zindagi mein aaya tha."

"Aur aaj main usse milne ja raha hoon."

Usne diary band ki.

Lekin uska dil ab bhi tezi se dhadak raha tha.

Agla poora hafta planning mein nikal gaya.

Kahan milna hai.

Kaunsi train.

Kaunsa time.

Kya pehenna hai.

Sab.

Har chhoti baat important lag rahi thi.

Kabhi Aarav mirror ke saamne khada hokar sochta,

"Main weird to nahi lagunga?"

Kabhi message type karta.

Delete kar deta.

Phir dobara bhejta.

Uski maa bhi notice karne lagi thi.

"Aaj kal bahut muskura rahe ho."

Aarav bas hans deta.

Kuch baatein maa se bhi nahi kahi jaati.

Aur phir...

Woh din aa gaya.

Subah se hi aasman badalon se ghira hua tha.

Baarish hone wali thi.

Aarav station par khada tha.

Haath thande ho rahe the.

Dil control se bahar.

Usne shayad pachaas baar phone check kiya hoga.

Train aa chuki thi.

Log utar rahe the.

Har chehra usse kuch second ke liye Naina lagta.

Phir nahi.

Aur tab...

Usne use dekha.

Blue kurti.

Kandhe tak baal.

Haath mein chhata.

Aankhon mein wahi shaanti...

Jo uski awaaz mein hua karti thi.

Aarav bas dekhte reh gaya.

Jaise waqt ruk gaya ho.

Jaise aas-paas ke saare log gayab ho gaye ho.

Sirf woh.

Aur Naina.

Naina ne use dekha.

Phir muskurayi.

Wahi muskaan.

Jo Aarav ne hazaar baar imagine ki thi.

Lekin asli muskaan...

Photos se zyada khoobsurat thi.

"Hi boring aadmi."

Aarav hans pada.

"Seriously?"

"Pehli line yehi hogi meri."

"Great."

Dono hans diye.

Aur us ek pal mein...

Teen mahino ki awkwardness khatam ho gayi.

Jaise woh pehle se hi ek dusre ko jaante ho.

Baarish shuru ho chuki thi.

Dono station ke bahar nikle.

Ek hi chhate ke neeche.

Road par bheed thi.

Cars ki lights paani mein reflect ho rahi thi.

Hawa thandi thi.

Aur Aarav ko lag raha tha...

Jaise woh koi film nahi.

Apni zindagi ka sabse khoobsurat din jee raha hai.

Dono ek chhote se café mein gaye.

Wahan baithkar ghanton baatein karte rahe.

Kabhi haste.

Kabhi ek dusre ko chidhate.

Kabhi chup ho jaate.

Aur har baar jab Aarav usse dekhta...

Use yakeen nahi hota.

Ye wahi ladki hai.

Jiski wajah se uski raaten kam tanha lagne lagi thi.

Shaam hone lagi.

Baarish ab bhi ho rahi thi.

Café ki khidki ke bahar boonden gir rahi thi.

Naina unhe dekh rahi thi.

Aarav use.

"Kya dekh rahe ho?"

Naina ne poocha.

"Kuch nahi."

"Jhooth."

Aarav halka sa muskuraya.

"Bas soch raha hoon..."

"Kabhi-kabhi zindagi itni acchi bhi ho sakti hai."

Naina uski taraf dekhti rahi.

Kuch seconds tak.

Phir dheere se muskurayi.

Lekin us muskaan ke peeche...

Ek pal ke liye udaasi guzri.

Bahut halki.

Itni halki ki Aarav notice nahi kar paaya.

Ya shayad...

Karna nahi chahta tha.

Us waqt usse bas itna lag raha tha...

Ki uski zindagi badal gayi hai.

Aur kai baar...

Insaan sabse zyada khush tab hota hai...

Jab use aane wale toofan ka andaza nahi hota.

Chapter End

"Teen mahine tak woh meri screen par thi..."

"Aaj mere saamne baithi thi."

"Aur mujhe laga..."

"Shayad kuch log kismat se nahi..."

"Duaon se milte hain."

🌧️

"Us din baarish bahar bhi ho rahi thi..."

"Aur mere andar bhi."

"Farq bas itna tha..."

"Bahar wali baarish thand de rahi thi..."

"Aur andar wali sukoon." ❤️

"Mujhe nahi pata tha..."

"Ki kuch mulaqatein zindagi badal deti hain..."

"Aur kuch..."

"Poora insaan."💔📖