I Wish We Never Met 2nd part

Chapter 2 — Every Night at 2 AM

"Raat ki khamoshi mein kuch baatein aisi hoti hain,

Jo din ke shor mein kabhi kahi hi nahi jaati.

Aur kuch log aise hote hain,

Jinse hum sab kuch keh dete hain...

Bina unhe kabhi dekhe."

Raat ke 2 baje the.

Poora shehar so raha tha.

Sadkon par sannata tha.

Khidki ke bahar halki-halki hawa chal rahi thi.

Aur Aarav...

Phone ki screen ko baar-baar dekh raha tha.

Usse khud samajh nahi aa raha tha ki woh kis cheez ka intezar kar raha hai.

Ya shayad...

Kis insaan ka.

Tabhi phone vibrate hua.

Naina:

Aaj bhi nahi soye?"

Aarav ke chehre par bina wajah muskaan aa gayi.

Ye muskaan use khud ajeeb lagti thi.

Kyunki pehle kisi ek message se uska mood itna accha nahi hua karta tha.

Aarav:

"Tum bhi nahi soyi?"

Naina:

"Neend aur meri dosti bachpan mein hi toot gayi thi."

Aarav hans pada.

Phir achanak sochne laga.

Kuch log mazaak mein bhi apna dard chhupa lete hain.

Aur Naina unhi logon mein se lagti thi.

Dheere-dheere dono ki baatein roz hone lagi.

Har raat.

Bina fail hue.

2 baje.

Jaise duniya ka koi niyam ho.

Jaise dono ki zindagi mein ek hi appointment fix ho.

"2 AM."

Ek raat Aarav ne poocha,

"Tumhari age?"

"20."

"Aur tum?"

"21."

"To matlab tum mujhse bade ho."

"Sirf ek saal."

Ek saal bhi bahut hota hai."

"Accha ji?"

"Haan. Isliye thodi respect diya karu."

Aarav zor se hans pada.

Kaafi dino baad.

Dil se.

Aarav ek middle-class family se tha.

Lucknow ke ek chhote se ghar mein rehta tha.

Papa government employee the.

Maa school teacher.

Sab kuch normal tha.

Lekin uski zindagi mein ek cheez hamesha se missing thi.

Koi aisa jo usse bina judge kiye samajh sake.

Bachpan se Aarav thoda alag tha.

Kam bolne wala.

Apni problems khud tak rakhne wala.

Logon ke beech rehkar bhi akela mehsoos karne wala.

Uski diary ke aadhe pages un baaton se bhare the jo usne kabhi kisi ko nahi batayi.

Aur Naina...

Naina bilkul alag thi.

Ya kam se kam woh dikhati aisi thi.

Woh har baat par joke maar deti.

Har serious baat ko hansi mein uda deti.

Lekin kabhi-kabhi uske messages ke beech aisi khamoshi aa jaati thi...

Jo bahut kuch keh jaati thi.

Ek raat.

Aarav ne poocha.

"Tum itna hasta kyun rehti ho?"

Kuch minute tak koi reply nahi aaya.

Phir message aaya.

"Taaki log ye na pooche ki main roti kyun hoon."

Aarav screen ko dekhta reh gaya.

Us ek line mein itna dard tha...

Jitna kuch log poori kitaab mein nahi likh paate.

Us raat pehli baar Naina ne apne baare mein thoda bataya.

Usne bataya ki uske ghar mein sab kuch perfect nahi hai.

Sab log saath rehte hain.

Phir bhi koi kisi ke saath nahi rehta.

Usne bataya ki kabhi-kabhi insaan ghar mein rehkar bhi ghar nahi mehsoos karta.

Usne bataya ki use bachpan se lagta tha ki uski baatein sunne wala koi nahi.

Aarav ne bahut der tak screen ko dekha.

Aur phir type kiya.

"Main sun raha hoon."

Bas itna hi.

Kabhi-kabhi kisi ko solution nahi chahiye hota.

Kisi ko bas ek insaan chahiye hota hai jo kahe,

"Main sun raha hoon."

Us raat Naina ne pehli baar likha,

"Thank you."

"Kis liye?"

"Pata nahi."

"Ye bhi koi jawab hua?"

"Nahi."

"Phir?"

"Bas... accha lagta hai tumse baat karke."

Aarav ka dil ek pal ke liye ruk sa gaya.

Usne kai baar woh message padha.

Phir dobara.

Phir teesri baar.

Pata nahi kyun.

Lekin usse woh line poori raat yaad rahi.

Din guzarte gaye.

Aur ab haalat ye ho gayi thi ki Aarav subah uthkar pehla message Naina ka check karta.

Raat ko sone se pehle uska last message padhta.

Kahin ghoomne jaata to uske liye photos kheenchta.

Koi funny baat hoti to sochta...

"Ye Naina ko bataunga."

Aur jab koi bura din hota...

To sochta...

"Bas 2 baje ho jayein."

Usse pata hi nahi chala.

Kab intezar aadat ban gaya.

Kab aadat zarurat ban gayi.

Aur kab zarurat...

Dil ke itne kareeb aa gayi ki uske bina sab adhura lagne laga.

---

Us raat 2 baje Naina ka message aaya.

"Aarav?"

"Hmm?"

"Agar ek din main achanak gayab ho jaun to?"

Aarav hans pada.

"Tum bahut ajeeb sawaal poochti ho."

"Phir bhi batao."

"Kuch nahi hoga."

"Sach?"

"Haan."

"Jhooth."

Aarav ne type kiya...

Phir delete kar diya.

Dobara type kiya.

Phir delete kar diya.

Aur aakhir mein sirf itna bheja.

"Shayad bura lagega."

Screen ke us paar Naina bahut der tak online rahi.

Lekin usne koi reply nahi kiya.

Aarav ko us waqt nahi pata tha...

Ki kuch sawaal mazaak mein nahi pooche jaate.

Aur kuch log jaane se pehle...

Anjaane mein ishare de jaate hain.

Chapter End

"Hum aksar sochte hain ki hum kisi insaan ke bina reh lenge..."

"Phir ek din woh insaan hamari roz ki aadat ban jaata hai."

"Aur aadatein chhoot jaayein..."

"To dil bahut der tak khaali rehta hai."💔

"Kuch log pyaar se nahi...

Intezar se apne lagne lagte hain."🌙✨