Aakhiri Message
Aakhri Message
Raat ke kareeb 12 baje the. Pooja apne kamre mein akeli baithi thi. Bahar tez baarish ho rahi thi aur kamre mein sirf mobile ki halki si roshni thi.
Uske phone par ek unknown number se message aaya:
“Main sab jaanta hoon…”
Pooja ka dil zor se dhadakne laga. Usne socha kisi ka mazaak hoga.
Usne reply kiya:
“Kaun ho tum?”
Doosra message turant aaya:
“Wahi, jise tumne 5 saal pehle andhere mein chhod diya tha.”
Pooja ke haath kaanp gaye.
5 saal pehle ki woh raat uski aankhon ke saamne aa gayi...
Ek sunsaan road…
Tez baarish…
Aur ek accident…
Us raat Pooja ne ghabrahat mein apni gaadi bina roke bhaga di thi. Usne kabhi kisi ko nahi bataya ki us accident mein ek aadmi zakhmi hua tha.
Uske maathe par paseena aa gaya.
Phir message aaya:
“Tumne socha tha sach kabhi bahar nahi aayega?”
Pooja ne dare hue poocha:
“Tum chahte kya ho?”
Reply aaya:
“Bas ek mulaqat… wahi purani jagah… aaj raat 1 baje.”
Pooja puri tarah darr chuki thi. Lekin uske paas jaane ke alawa koi raasta nahi tha.
Raat 1 baje woh us sunsaan road par pahunchi. Baarish ab bhi ho rahi thi. Road bilkul khaali tha.
Achanak uska phone baja.
Unknown number.
Usne kaampte haathon se call uthaya.
Dusri taraf se ek dheemi awaaz aayi:
“Peeche mudkar dekho…”
Pooja ne dheere se peeche dekha...
Wahan koi nahi tha.
Tabhi phone par hasi ki awaaz aayi.
“Dar lag raha hai?”
Pooja cheekh padi:
“Kaun ho tum?”
Awaaz boli:
“Jise tumne mara hua samjha tha…”
Itna sunte hi Pooja ke saamne ek aadmi andhere se bahar aaya. Uske chehre par gehri chot ke nishaan the.
Pooja ro padi:
“Mujhe maaf kar do... main darr gayi thi...”
Woh aadmi muskuraaya.
Aur bola:
“Maafi? Main maaf kar deta... agar us raat मरने वाला मैं होता.”
Pooja ka chehra safed pad gaya.
Usne kaampte hue poocha:
“Matlab...?”
Woh aadmi dheere se uske kareeb aaya aur bola:
“Us raat tumhari gaadi se mera beta mara tha... aur aaj se tumhari zindagi ka har pal mera hoga.”
Ye kehkar usne Pooja ke phone par ek video bheja.
Video mein Pooja ke ghar ka live footage chal raha tha...
Aur uske ghar ke andar koi maujood tha.
Pooja ki saansein ruk gayin.
Phone par aakhri awaaz aayi:
“Ab tum samjhogi... kisi apne ko khone ka dard kya hota hai.”
Uske baad line cut ho gayi.
Pooja darr ke maare ghar ki taraf bhaagi…
Lekin ghar pahunchte hi usne dekha—
Darwaza khula tha,
ghar bilkul khaali tha,
aur table par sirf ek note pada tha:
“Ye to bas shuruaat hai…”
THE END... OR MAYBE JUST THE BEGINNING.
✍️ Ek Khamosh Aurat ✍️